احيان اقول ان الصراحه عظيمه
انك تعيش احساسها في معانيك
واحيان ..اقول ان الصراحه أليمه
تجرح.. بها قلبن من الشوق يغليك
واحيان اقول ان الصراحه يتيمه
تموت في قلبك … وتذبح مباديك
من جاك في حشمه يروح بحشيمه
خل الرحابه في ..جبينك ..تخاويك
ودام المحبه في ..الحنايا .. مقيمه
اعقل مطايا الشر وادفن مساويك
لو كل غيمن ..بالسما ..جاك ديمه
مامر …من فوقك ويمطر …حواليك
ولو كل ..يمنن ..بالعـطايا..كريمه
ماكان بين الناس عاشت صعاليك
الظن بين الناس …دايم .. ظليمه
لنه على …شك …التهايم ..يخليك
وترى العرب قالت عن اهل النميمه
الي ..حكالك بالسوالف ..حكا فيك
بعض الميانه تفقد الشخص قيمه
وبعض الميانه للمشـــاكل تـوديـك
ارفع جنابك …والسلامه ..غنيمه
مادام ربي من ..نعيمه ..مغذيك
واترك مسافه .. للعقول السقيمه
واضبط علاقاتك على راحة ايديك
ياكثرهم عند … العزا و العزيمه
لكن قليل ..اللي بهم من يواسيك
خلك حريص ..وخل روحك حليمه
ترقى على بيض النوايا خطاويك
وترى الاكيد إن العـلاقه السليمه
تبعد عن اللي مــايخصـك ويعنيك
فريح المحيني
