مسير الثواني ما اثقله في عتاب الشوق
و سجين انتظار النور زنزانته فكره
يعزف الونين الحان على قوسه المفهوق
و غنى انا استأذن و بأكلمك بكره
ترى المخلص بحبه يذوق العنا و يذوق
مرار الصبر و الصبر يوريك ما تكره
انا من بعاده في كتوم الخفوق فتوق
و كن الوله قلبي للآلام محتكره
تلفت عليه عيون تلوّت عليه عنوق
و عليه انطوى حالي مثل مطوي المكره
و الى قال ( الو .. لبيه ) جريح الفؤاد يروق
و يذهب بها عقلي مثل مذهب السكره
عبير الحروف يفوح مثل فوحة الزملوق
عبقها من الطايف ليا من قطف بِكره
على دافي انفاسه يذوب الحكي برفوق
و تخالط عسل ريقه مع حكيه و فكره
اضيق ان تباطيته و يسولف معي و اتوق
غرامٍ خذاني له به الروح مفتكره
وطن و الغريب احساس و ثوب الصبر مشقوق
و الايام صافيها قبل ضحكته عكره
سما فيه حلّق حس خذاه بحنانه فوق
و الالباب ف شعوري و الإحساس مدّكره
هديه من المولى مطر يطفي المحروق
من اللي وجب حمده من اللي وجب شكره
ترى المرهف المرتاب من النايبه مخنوق
يخاف الزمان اللي كوى طيبه ب مكره
و انا سقت لوصالك خيولي و سقت النوق
و لا باقيٍ مهره و لا باقيٍ بكره
فلا تذبح العاشق ب سيف الوله و الشوق
و لا تقول انا استأذن و ب اكلمك بكره
جزاء المسردي
