عروق قلبي للشاعرة سميره العتيبي

‏من باع قلبي والغلا مارجيته
‏نفسي من العفه بعيدٍ مداها

‏واللي يحسب اني اليا غاب جيته
‏كلن بخيص بنيته لانواها

‏اللي يبيني كل عمري عطيته
‏ومن صد عني شرهتي ماخذاها

‏لاجفت عروق المحبه سقيته
‏وعروق قلبي مالقت من سقاها

‏اكضم واقدم طيبي اللي بديته
‏من صفحة كتابٍ كذا محتواها

‏عامل تُعامل هكذا اللي قريته
‏الا هل الصدات ماطلب رضاها

‏ياللي تدور كان طيفي لقيته
‏لاتعتذر وجروحي القا دواها

‏قلبي تغير ماهو اللي هويته
‏لو كان نبضاته يجي لك صداها

‏حكيي فعل والله لامن حكيته
‏ولاحدن يقول بهيبتي وش وراها

‏من عز ابوي العز كله خذيته
‏متوارثه طيب العلوم وحلاها

‏من عفتي جف الخفوق ومليته
‏واقفيت عن ناسٍ عطتني قفاها

‏سميره العتيبي

اترك تعليقاً

لن يتم نشر عنوان بريدك الإلكتروني.