إلهي والسنين اللي مضت لي بالذنوب كثار
مضى العمر فـ ملذاتٍ بها الشيطان يغويني
خذتني غفلة أيامي ونسيت أن الزمن دوار
لهيت ولا وعيت إلا بعد ما ضاعت سنيني
أحاول ألقط أنفاسي وأبرر كل ذنبٍ صار
وعجزت ألقى لنفسي عذر لا قلته ينجيني
غريق أدور أطواق النجاه ولا لقيت أنصار
تعبت أصيح للعالم أبي من يمسك يديني
على كثر البشر حولي ولكن بيننا أسوار
أسولف وأحسب العالم إذا سولفت توحيني
أعيش بديرتي لكن أحس إني غريب ديار
أهيم بوحدتي ضايع بها مدري أنا ويني
غريب ديار أو مدري أحس إني غريب أطوار
أبي تفسير لشعورٍ أحسه مضطرب فيني
رميت اللي حصل فيني وعلقته على الأقدار
وأنا أدري كل ما فيني من ذنوبٍ تخاويني
أواسي نفسي بنفسي لو إنه طول المشوار
وأقول إن ضاقت الدنيا مع الأيام بتزيني
هموم الوقت لو تكبر بعيني ما لها مقدار
تهون هموم هالدنيا بعيني لو بكت عيني
أصارعها ليا كبرت وأقول إن الهموم صغار
مدام إن الكبير الله يا همي منك يحميني
إلهي وأنت من يعلم بما تخفى من الأسرار
يا سامع دبة النمله .. يا رازق كل مسكيني
يا فارج كربة عبادك .. يا جالي حيرة المحتار
يا مالك ملك هالدنيا .. يا فارض نعمة الديني
يا معطي من دعا بأسمك وأنت الواحد القهار
يا غافر زلة المخطي .. يا جاعل للبشر حيني
إلهي كثرت ذنوبي وأنا عبدك وأخاف النار
بكت من خشيتك عيني دخيلك لا تخليني
سلطان خلف الرويلي
حےـزن القصےـيد
