كأس الغلا للشاعر: عبدالله عوجان

أسكبك في كاس الغلا وْيفرغ الكاس
وتضيع فيه بعمق وأضيع أنا فيك

وأسمع صدى صوتك تقطّع من الياس
وْعلمي بقلبي يوم قال الك لبّيك

وألقى على شاطي بحر عينك الماس
وابحر بلجّة سوِدك النجل واغديك

وارسمك في لوحة خيالي عن الناس
واخفيك عن نظرات الاعين واخاويك

واسندس ارضك ورد واقطفك من ساس
جذرك واصون اصلك وفرعك واداريك

واهندس ابيات الغزل فيك باحساس
صادق واصوغ الحرف من وجد وادعيك

يابو عيونٍ خرس والقدّ ميّاس
من وين ما انساق الهوى لي يودّيك

ويحطّك بقلبي عن الهمّ والباس
وافرش لك سفوح الحنايا واحيّيك

يامرحبا بك عدّ ما هبّ نسناس
ياللي على وجدي تجيني وانا اجيك

واسكبك في كاس الغلا وْيمتلي الكاس
واشربك واضمى وارجع اسكبك وارويك

الشاعر/عبدالله عوجان

اترك تعليقاً

لن يتم نشر عنوان بريدك الإلكتروني.