ماضاق صدر الكلام للشاعر مبارك الحارثي

ما ضاق صدر الكلام اللي بدون اهتمام
لو ضاق صدر الشمالي في محل السعه 

باب المشاريه صّنف في العتب والملام
والمنطق المحترم والعكس من منبعه

صارت فنون التجاهل فرض مثل الدوام
نمشي مع المحترم ونجامل الآمعه

يا معاتبي عن غيابي والله اني تمام
وبعيد عن ثورة الاخصام والزعزعه

ضد الزعل والكبر والضيق والانتقام
ومن فضل ربي عليّه مجتنب الاربعه

والآدمي ما يضره غير كثر الكلام
والناس تسمع وتنقل كل ما تسمعه

الوحده الدايمة جذابة الاحترام
والذايقه من حلوم الزيف متشبعه

واللي حفظته من اصدق ما جتباه السلام
ما يفقد العبد حاجه دام ربي معه

مبارك الحارثي

اترك تعليقاً

لن يتم نشر عنوان بريدك الإلكتروني.