يا ام العيون الناعسه يا ام الاهداب
ما فيه غيرك صاد عيني حجاجه
لاتذبحين اللي من الشوق منصاب
ماله ورا غيرك من الناس حاجه
في غيبتك سوالفه كلها اغراب
وفي جيتك حرفه يزيد ابتهاجه
شاعر على شانك طرق كل الابواب
بين اضلعه يخاف كسر الزجاجه
مرهف ولكن للاحاسيس طلاب
دام الفراق اليوم شيّد سياجه
تكفين خلّي طاري الحب ينساب
مثل السحاب اللي يزيل العجاجه
دام الغلا بالقلب للحين ماشاب
شبي شموع الشوق وادني اسراجه
تعبت اعاتب مابقى صبر واعتاب
وحاولت اواجه ماقويت المواجه
حاولت ادور له عذر ضمن الاسباب
ماودي أكون السبب في احراجه
اما حضورٍ مايجي بعده اغياب
والا الفراق اللي مابعده تواجه
الشاعر/مفرح سويد العنزي.
