نسايم..للشاعر فواز العتيبي

ما كل مانبغي نقوله نقوله
ولاكل مايُعرف عن الناس ينقال

ولا كل موقف للرجل هو رجوله
بعض المواقف تنقصك وانت رجّال

بعض البشر يعجبك لاشفت زوله
واليا بحثته لا له منطق ولا افعال

وعن معدن الرجال تنبي فعوله
أكبر خطأ تحكم على الخلق باشكال

وكل شي ينسى في حياة الطفوله
إلا اليتم ما ينمحي بعقل الاطفال

وانصحك عن غيّ العقول الزعوله
اعقم نقاش ان صار مع ناس جهّال

وترى المنى ماكل شخصٍ يطوله
والكايده ماتبعده عنك الآمال

وترى الخبل من جاك يشعب ذلوله
تلقاه مع كل العرب ضد واقبال

واعذب غرام الروح عذرى خجوله
تاخذ من اريام الفلا وصف وامثال

العين عين مذيّراتٍ جفوله
من فوقها رمشٍ سطا كنّه ظلال

و بثغرها صفّن مع الدرّ لوله
لا من تبسّم كنّه البدر فالحال

ولا من زعل مثل الزهر في ذبوله
هذي مزايا سقتها دقّ واجلال

وختامها أزكى الصلاه لرسوله
على النبي سِيد البرا خير مرسال

الشاعر/فواز العتيبي

اترك تعليقاً

لن يتم نشر عنوان بريدك الإلكتروني.