ياسعود ماباقي لي الا انت ياسعود
يوم ان وقتي بالهنا ماصفالي
هذي ثلاث سنين وايامنا سود
وانا تعبت وضامني ماجرالي
الحزن في صدري مع الليل موعود
والقلب يشكي من صدوف الليالي
أصدّ لو مالي عن طعوني صدود
وأذكر لامر عصير لمّة عيالي
هنا علي لو راح ماهو بموجود
يبقى مكانه مارحل عن خيالي
وهناك زول امي لو الصوت مردود
والله لأنادي لين يرتاح بالي
وهذاك مركى العود واقفاية العود
زادت غرابيل الزمن وانعزالي
ياسعود راحو خلو الباب مردود
وانا اتلفّت والمآسي قبالي
أصكّ بابي والأمل فيه معقود
يمكن يدقّ الباب حيٍّ طرالي
وين الرفيق اللي له الكف ممدود
يوم اني اعطي صاحبي من حلالي
وقت الرخا ما نمت والعالم رقود
واليوم وينه يوم كلٍّ بكى لي
حشمت دمع العين عن كل منقود
واقفيت ألم الضيق لعيون غالي
ياسعود أنا مما جرى طحت ياسعود
ولا فيه غيرك ياضنيني بقى لي
