ياشمس- نورك مايغطيه غربال
ولاتحجبك- ياشمس عنّا سحابة
تبدين مع رووس الشواهق والاقذال
ومسراك نجهل دورته وانقلابة
تودعين أجيال ومن قبلك أجيال
غابوا وعلم الغيب مايندرى به
مدري متى ياشمس يصفن الأحوال
والمغترب يرجع ويلمس ترابه
ياشمس بحت ، وبوحي أشعار وأمثال
ومن الزمن . صارت جروحي تشابه
مدري خطأ يوم أسمق القاف وأختال
ولا قدا يوم أكتبه- وآعنا به
ياما شهق حرفي على يمة الجال
وياما زفر من لوعته واغترابه
وياما رسم وجهه على بيض الأطلال
علّ السنين تعيد فرحة شبابه
غاياتنا ياشمس ماجت على البال
وآمالنا تروي سطور الكتابة
وصدورنا للعز والطيب مدهال
ورث ٍ على طول الحياةانحيا به
قلته وأنا لأعذار الاجواد قبّال
بالطيب والوجه النقي والذرابة
ماني ليمنى الجود بايع وختال
ولاني من اللي ينكرون القرابة
أحرص على رفقة نزيهين الأفعال
وأشفق على حي(ن) تقافت ركابه
حنا ضيوف وضيف الأيام رحال
لابد ما يرحل ويطوى زهابه
يالله ياللي للعسيرات حلال
ياواحد ٍ كل الخلايق تهابه
رحماك يامنزل تبارك والانفال
باللي كتب شكواه واقفل كتابه
الشاعر إبراهيم بن علي الذويبي
فريح المحيني
03/05/2018 at 18:38صح لسانك نص شامخ ورااائع مبدع اخوي ابراهيم الله يحفظك
فواز العتيبي
07/05/2018 at 03:40كلمة ابداع قليل صح الله لسااانك مدد